XX. mendeko Euskararen Corpus estatistikoa

Testuingurua

Euskal-Erria eta Errioxa AGIRIKO LOKARRIZ ELKARTZEN

Latxaga idazle bezain ibilkari ezaguna ta biok or gabiltz, alkar asko ikusi gabe, baiñan geienean bide berperatik, leen noizbait gure izan zen eta gaur ere nola edo ala zertxo bat gurea den Errioxa, batipat Garaia, gurenganatu naiean.

Bai ark eta bai nik, emen, lur ordeka, zelai auetan, gari-leku eta maast-toki auetan, nai genduke ikusi, besterik ez bada, delako week end eta oporraldietan Euskal Erri`ko endea.

Orain arte, or ibilli dira zenbait euskaldun eta jakintsu eta dabiltz ere gaurregun antziñako toki-izenak eta familien deiturak biltzen, mendiz mendi eta erriz erri, direla Aingeru Irigaray, J. Caro Baroja, Merino Urrutia ta Anguiano`ko errian baita ere Ana Mari Echaide.

Latxaga jauna berriz zer esanik ez dago.

Oraintxe bertan atera berria du liburuxka apaiña Errioxa`ko San Millan, Euskal iturri izenpurua duelarik.

Arraioa! Ez dugu nagirik oiñetan gure Latxaga`k (Edili`k atera du, On Manuel jaunaren aintzin-solas polit batekin).

Baiñan ontaz beste noizbait eta beste nonbait mintzatuko naiz patxaragoan.

Beraz, bego ortan bertan gaurko esana.

Imanol Laspiur jaunak ere (barka dezala jaunaz tratatzea, sozialzale xamarrak bai dira eibartarrak) egiten ditu, oporraldietan, Ezkaray`n, ikerketa emankorrak.

Ea, Imanol, noiz argia ikusten duten.

Emendik mende bat edo geiagora, ziur egon eta izan, Errioxa Garaia euskal izenez josita egongo da.

Ba dirudi Euskal Erri atsituaren arnas leku garbia biurtzen ari dela Errioxa Garaia.

Oraiño mendietako gaillurrek erreka ziztor garbiak bidaltzen dituzte.

Oreiñak eta oreinkumeak saltoka dabiltz Ezkaray`ko inguruetan, erriko baratza txukun guziak lardatzen dituztelarik.

Orein eta arkatzen azitegi edo erdaraz vivero deritzanak Cameros`go mendi-saldoan dagoz.

Nonbait, entzun dugunez, burges edo aristokratarentzat itsitura edo kotoren bat artzeko asmoa dute.

Ez du antxe sartzerik izango ozta ozta salario minimoan kokatua dagoen langilleak.

Ba dirudi geroruntz begira Euskal Erri muskerra edo berdea andik aldetik, Pirineos arunztik eta Errioxa aldetik izango dela.

Bizkaia`k batipat joera andia du lurralde auetara.

Ta, laster, emendik iru edo lau urtera, zer esanik ez, delako autopista del Ebro orrek lotzen duenean zuzenki Calagorra, Logroño, Haro Bilbo`kin.

Gizon jakintiak diotenez, ordubete eta apur bat geixagoan Bilbo`tik irten den kotxea iritxiko da Logroño`ko irira.

Zerbait da.

Asi da Errioxa goruntz begiratzen.

Il onen l9`an, Sociedad de Amigos del País deritzanak deiturik (Real Sociedad Vascongada de los Amigos del País) munibetarrekin alkartu dira Gernika`n, gure arbolatik ez ain urrun, Logroño`ko Instituto de Estudios Riojanos, jaun Briones, Diputazioko Leendakaria, buru dutelarik.

Urrengo illean, berriz, Euskalzaindiak bere billera San Millan`go Monasterioan izanen du.

J. LASA.